免費補習天王

何振健，26歲，軟件工程師，香港義工補習社創辦人。利用工餘時間開發自動配對軟件，成立網站，為應付公開試的貧困中學生，配對免費補習老師，「考試唔代表乜嘢，但公開試考得好，走少好多冤枉路」。坊間針對公開試的雞精班其門如市，他卻主張無料補習，還找來狀元為準考生分享應試心得，「唔係頂爛市，只係想個世界公平啲！」扶一把，命運或從此改變，且聽這個「另類補習天王」怎麼說。記者：呂麗嬋

「我喺中大電腦系畢咗業兩年，比好多同齡嘅年輕人幸運，搵到屬於自己專業嘅工作。同好多基層家庭一樣，我爸爸做廚房，媽媽係家庭主婦，有三兄弟姐妹，排最大。係唔使住板間房，最窮唔到我，但讀書、搵工，乜?都要靠自己嗰種家庭。由細到大，我讀書算叻，唔使補習，順利考入U，中學時代，仲成日幫人補習賺外快。

補習社針對的貧困學生中，多達四成都是重讀生。

貧富懸殊是殘酷現實

有時遇上啲學生家境唔好，但好畀心機嘅，我都會自動波收平啲。試過幫住喺樓下嘅兩兄弟補習，哥哥好勤力，A-level考到幾個D，但差少少入唔到大學。好可惜佢家境唔好，要養家，後來就喺Pizza Hut做廚師。講到底，做廚師都係一技之長，但我會諗，如果佢入大學會讀乜科呢？人生又會唔會唔同呢？
畢咗業，朋友聚埋，都係傾工作同待遇。大學同學出路相若，中學同學，差距可以好大，我嘅同學之中，有啲做咗小巴司機、有啲做售貨員。我叫做好彩，入到大學，好歹叫工程師，但都會好欷歔，覺得呢個世界好唔公平：屋企有錢，考得唔好，可以去外國讀書，唔係就去阿爸開嘅公司做嘢，一樣有出路；但若家境唔好，選擇就變得好有限。
唔係想挑起貧富懸殊，但呢個係殘酷現實，跨代貧窮真有其事。之前教院有個調查，話窮學生同富學生，入大學嘅比率相差三倍，唔公平嘅起跑線，永遠係個困局。好想改變，幫?啲家境唔好，但又好有心想讀上去嘅人。如果補習可以將「差少少」收窄，令佢哋跨過大學門檻，未來走嘅路都會平坦一啲。到我出咗嚟做嘢，𠵱團火一直冇熄。

自動配對　700師生登記

一個人嘅力量有限，寫軟件係我專長，我就諗到不如搞個全自動網站，由登記註冊嘅學生，利用搜尋器，同願意義務補習嘅導師自行配對，效率高、慳番行政費。網站自上年11月底上線，綜援家庭、新移民同非在校人士等，都係優先服務對象。網站運作短短兩個月，已有700師生登記，當中近四成學生都係重讀生！
網站冇錢宣傳，我哋開facebook、喺討論區介紹，竟然有好大迴響。𠵱家，網站核心成員有八個，大家都係義工，當中有大學生，亦有在職人士。除咗免費補習、搞雞精班幫學生應試，上月底，我哋仲拍膊頭搵咗幾個狀元，喺理大分享考試心得，遲啲，我仲希望開放平台分享教材，令更多人受惠。網站仍屬起步階段，冇會址冇資金，但萬事起頭難，踏出第一步，最重要。」

有心人助貧困小學生

除了針對中學生及應付公開試的「香港義工補習社」（http://www.hkvtutor.org）外，「陳校長免費補習天地」（http://www.eoe.org.hk）及「文宣學社」（http://www.mansyun.hk），都是由民間有心人發起的社團，同樣為邊緣貧困學生提供免費補習服務，不過對象主要是小學生。前者由前直資學校校長陳葒創立，力倡有教無類；後者由一群中七學生於2011年6月成立，主要借用區議員辦公室及互委會會址小班補習，由一位大學生領導，配以一至兩位中學生助教輔助進行。 

 Source: appledaily