髮剪局3：潤‧髮

前一頁男士理髮一刀剃淨，乾淨利落不留痕。女士古方護髮，花樣就多了。老實地賣「朱義盛」的老實公司，1926年於上海街開業，1988年搬到油麻地。兩年前因為業主賣舖而結束營業，卻不代表劈炮屈服。現在店主莫氏夫婦，仍在上海街民光電器行，及網上寄賣其自製的招牌生髮/護髮油──刨花油。同時，這刨花油2011年還和「打小人」一起，入選非物質文化遺產候選名單之一。
記者；陳慧敏
攝影：陳盛臣、楊錦文

■60歲的莫太使用刨花油四十多年，頭髮仍烏黑油亮，得幾條白髮。真係咁堅？

剪到手軟送禮佳品

話說1980年，首位香港小姐孫泳恩在電視上揭示小時候頭髮稀疏，用刨花油後，養得一頭烏黑長髮的秘密，掀起一陣刨花油熱。莫先生：「好古老喇！以前啲阿婆、馬姐最鍾意洗頭後，用刨花油搽辮，編出嘅辮貼服柔亮。」天然壓榨出來的油其實不是油，不黏手，不惹塵，沾到皮膚也不會長痘痘，同是送禮自用佳品，莫太：「50年代，好多人攞住個樽仔去買刨花油，有啲專登買嚟送返鄉下。」洗淨頭髮乾透後，沾一點點刨花油當髮尾油用，攝影師話抵過椰子油多多聲！

製作刨花油，首先要將用楠木刨出來的薄片，剪成每條不到1毫米的刨花絲，浸泡一星期，才能與茶籽油放到攪拌機去絞碎。泡軟了的刨花絲仍很硬，所以每攪兩分鐘，就得關機讓機器休息一小時。小半壺刨花最少得攪拌20次，攪攪停停最少四日。然後將刨花茸隔油兩次，揸出每両$15的刨花油。最喜歡這種「唔使用腦」的工作，腦袋放空，專心致志地剪，簡直是靈魂的修為，過年最啱。然而剪了大半片，夾實三片刨花的左手發緊，拿剪刀的右手發疼，靈魂開始崩潰，莫太：「係好難㗎，有時剪到對手唔郁得㗎！」

除了全天然的古法護髮刨花油，他們也兼賣天然的洗髮古方──茶籽泥。莫太：「以前啲人將茶籽製作成個砧板咁賣，用嗰陣砍下一角開水，黃澄澄，記得隔渣先用，唔係洗到一頭泥！」望見莫太舀出一坨如肥料的泥，混着雜草。泥水？洗頭？唔係啩！然而上網一查，原來現在許多推崇純天然護理用品的店，都有介紹茶籽油，茶籽，即是老年茶花的果實，以一年時間，吸盡日月精華方能結果，內裏所含與人體最合拍的油酸量、比美容界聖品橄欖高20%，用來塗臉的話防暗瘡皺紋雀斑，洗完頭還可以順便杜蟲！簡直無敵！

■以前的人挑幾擔楠木沿街叫賣，有人買就刨幾片，用水泡出黏性就可用。

■莫先生有幾十個這樣的攪拌杯，不過大概用幾個月就會壞，要不停進貨。但科技常常更新，配合得了攪拌座的杯已買少見少。

■經過20次攪拌後，樹皮變茶渣，之後再製成油。

■刨花油有原味，及加了玫瑰或白蘭香味的，小瓶裝$90起。

查詢：23843736

剪到手軟送禮佳品

話說1980年，首位香港小姐孫泳恩在電視上揭示小時候頭髮稀疏，用刨花油後，養得一頭烏黑長髮的秘密，掀起一陣刨花油熱。莫先生：「好古老喇！以前啲阿婆、馬姐最鍾意洗頭後，用刨花油搽辮，編出嘅辮貼服柔亮。」天然壓榨出來的油其實不是油，不黏手，不惹塵，沾到皮膚也不會長痘痘，同是送禮自用佳品，莫太：「50年代，好多人攞住個樽仔去買刨花油，有啲專登買嚟送返鄉下。」洗淨頭髮乾透後，沾一點點刨花油當髮尾油用，攝影師話抵過椰子油多多聲！

製作刨花油，首先要將用楠木刨出來的薄片，剪成每條不到1毫米的刨花絲，浸泡一星期，才能與茶籽油放到攪拌機去絞碎。泡軟了的刨花絲仍很硬，所以每攪兩分鐘，就得關機讓機器休息一小時。小半壺刨花最少得攪拌20次，攪攪停停最少四日。然後將刨花茸隔油兩次，揸出每両$15的刨花油。最喜歡這種「唔使用腦」的工作，腦袋放空，專心致志地剪，簡直是靈魂的修為，過年最啱。然而剪了大半片，夾實三片刨花的左手發緊，拿剪刀的右手發疼，靈魂開始崩潰，莫太：「係好難㗎，有時剪到對手唔郁得㗎！」

除了全天然的古法護髮刨花油，他們也兼賣天然的洗髮古方──茶籽泥。莫太：「以前啲人將茶籽製作成個砧板咁賣，用嗰陣砍下一角開水，黃澄澄，記得隔渣先用，唔係洗到一頭泥！」望見莫太舀出一坨如肥料的泥，混着雜草。泥水？洗頭？唔係啩！然而上網一查，原來現在許多推崇純天然護理用品的店，都有介紹茶籽油，茶籽，即是老年茶花的果實，以一年時間，吸盡日月精華方能結果，內裏所含與人體最合拍的油酸量、比美容界聖品橄欖高20%，用來塗臉的話防暗瘡皺紋雀斑，洗完頭還可以順便杜蟲！簡直無敵！

我認得你！

係，由細到大，髮型屋裏一定會見到這種「太空罩」，同事叫佢「血滴子」。每次見它「降落」，即代表「有排坐」。

■最早期的大風筒都鎖死了在牆上，後期才變成有碌有腳，髮型屋裏通處走。

■70年代出品大風筒，其實只係個吹熱風的大風筒。

■對，90年代末出品的電髮器，即初代的搪瓷電髮儀。

■以為是「血滴子」進化版，不，這卻是蒸氣機，生於80年代，用來焗油。

■農村裏，鐮刀剃頭！正宗巧奪天工，卻惹來「剃頭佬」市井之名。

■1960年由理髮業公會出版的《理髮通訊》，說元朗水災工友無家可歸，發起贈送衣物等援助活動。

■1964年華東賑災，在旺角勞工子弟學校籌款，做個剪髮騷，門券收益用來賑災。

■標叔的老舖新麗都兩年前結業，依然在追趕時代潮流，變了今日──劏房。

由剃頭佬到髮型師

經營了新麗都髮型屋大半個世紀，退休兩年的標叔：「50年代左右，啲人叫我哋『剃頭佬』㗎咋！70年代叫師傅，𠵱家就叫髮型師，好明顯地位提升咗啦。」1953年，香港理髮室總公會成立，隨着社會轉變幾度改名，也紀錄了香港理髮及美容業的轉變。

標叔：「以前市政局有條法例，說舖頭不准擺痰罐、舖頭一日要消毒幾次、髮型師一年要驗幾次身來確保衞生，師傅們去不同地區又要登記。」我諗起卡通片《怪獸公司》。標叔：「我哋邊有咁多時間？好在有工會團結反對。不過都因為咁，後期啲飛髮舖都越做越有規模，越做越企理，就係咁解囉。」
「嗰陣時我哋淨係想快啲有門手藝，同幾個老友記開店做老闆、識個大姑娘拍拖。於是就走去搵師傅學師。嗰時真係要幫手煮飯、買煙、掃地拖地。做咗八個月雜工，先叫做學識洗頭。浪費時間㗎！咪當訓練耐性同服從度囉。睇電視，睇見柯德莉夏萍、米路花拉、林黛同林鳳個奧米茄頭，一係企喺師傅後面偷師，睇完借朋友個頭來試整，邊有假人頭俾你試剪咁好呀。現在年輕人邊肯同你浸兩年做呢樣？」梗係啦！八個月喎！我去工聯會都拿了幾張證書了！所以70、80年代以後，學徒們都跑到培訓學校去，短短的課程，學會剪髮電髮的基礎，在髮廊裏跟師傅又偷幾年師，升做師傅，想增值又可以返工會上課做技能提升，條路一路都好順，真好。標叔：「幾個師兄弟儲錢租個二樓舖做老細，不很難。」「租個二樓舖」同「不很難」，心，突然的隱隱痛。

面臨考試與認證

現在香港的理髮師，正面臨將來或會實行的考試認證政策。香港理髮化妝業職工總會主席梁子光：「其實早於十年前，國內的理髮師都要考認可證。正如我哋𠵱家如果想返國內做嘢，其實都要考同一個國家職業認可證，考試內容除了實戰外，最重要還要念大叠中外髮型歷史。由漢唐到滿清到八國聯軍，甚至世界髮型潮流演變都要讀到，聽落有趣，但難讀，個證得到英國、澳洲同歐盟共五十多個國家承認，香港美髮業也有一個類似的『資歷架構』認證，提高行業資歷，實行咗五年，但反應未算理想。」現在政府正計劃讓業內人士考取這個認可證。梁子光：「但若年紀大的老師傅都要攞證，就會抹煞咗佢哋嘅經驗。所以𠵱家需要一個過度期，等一班有資深技術同經驗的老人家一路過度。」

Source: appledaily

髮剪局1：飛‧髮

人在西營盤第二街，陋巷街角，收音機長期調到商業電台第五台，背景音樂是松松姐姐的《月兒彎彎照九州》。我與攝影師、以及85歲的胡師傅、陳師傅，圍着圈，攤開雙手凌空凝住。胡師傅和陳師傅定過抬油，雙手絲毫未動，我和攝影師，二人四手，不夠五秒，勁震。幾鋒利的刀都有生銹的一日，桌上幾把60年歷史剪刀磨得又短兼生銹，兩位雙手，卻真的未老。
記者：陳慧敏　攝影：陳盛臣

好搵過當差

訪問途中，一直有客人走來，吹水的幫襯的。年尾流流，我怕阻你工作喎陳師傅，他一揮手：「唔阻唔阻，我哋呢度唔阻嘅！」然後被按着頭飛髮的老顧客，也有一句沒一句的搭嘴。
曾經，香港打工仔去剪頭髮，密過OL去做Facial，當時，我們都叫「飛髮」，由「fit髮」演變而來。
三個沙煲兄弟於日治時代，十一、二歲學師，歷經了三年零八個月，17歲成為正式師傅養活一家七口，六十年前在常豐里開廣東理髮店一腳踢，後來拆樓，四十年前搬到第二街角落頭一間小石屋繼續經營至今。
現在店裏剩下85歲的胡師傅及80歲的陳師傅。店裏二手買來的理髮椅，同甘共苦了六十年，加起來上百年歷史。每次有客人要刮鬚，抽起個大鐵鎚般的頭枕碰一聲裝上。五十年代高峯期，朝早七點做到晚上十一點，陳師傅：「做到《夜半奇譚》，講鬼古嗰陣先收工呀！」甚麼時代如此旺場？「最旺係柏立基做港督嗰屆囉！當時香港鎖港，人口又少，盲的跛的都有茶樓請佢哋賣包。」1958年柏立基出任港督，並為香港爭取了財政自主權，財政預算不必交予英國審批，但同時社會貪污成風，想做份最低級的政府工都要使黑錢疏通兼要查三代。陳師傅：「嗰時做呢行好好搵呀！啲人飛髮又勤，個個都好工整嘅真係。一個月頭最少嚟剪兩次頭髮，有錢嘅剃鬚剪髮，一個月嚟四次！當時做警察先得160蚊一個月人工，掃垃圾105蚊，剪頭髮有三百幾蚊。有皇家工（政府工）我都唔去做啦！如果唔係，我𠵱家食長糧喇！」

廣東至係最醒

四十年前，小店還在常豐里之時，有好多公仔書，當時的家庭個個都有四、五個小朋友，小朋友剪髮四毫，大人剪髮五毫，洗埋頭七、八毫連剃鬚，一家人來就把小店坐滿。那一代人剪頭髮，幫襯開就好似入了會似的，每隔一陣就自動回來報到。十來分鐘的相聚時間，洗頭剃鬚為名，聚舊打牙骹為實，一跟就是幾十年。陳師傅：「現在老顧客都少喇，有都死晒喇。幫襯開嗰啲起碼都拍得住我哋年齡喇。」
戰後大陸開放，好多上海師傅來港開「上海理髮舖」，門面靚，服務好，說穿了其實師傅們大抵都來自揚州，卻以上海自稱，因為聽落又潮又摩登，仲可以收貴幾蚊。陳師傅想起有點不忿：「上海（師傅）有限嘅啫，嗰啲人一味討好客人。你知中國人一味抬住人哋大髀話人哋叻㗎嘛，但邊夠我哋廣東人叻呢？問心講句喇！分別呢，上海師傅嘅舖頭，裝潢好、企理啲，又有煙仔食，又畀毛巾你抹面，招呼妥當，我哋廣東人，啲下欄功夫唔做嘅！師傅就係師傅，佢來飛髮你就畀佢坐，就係咁。我做咗六十幾年，都係呢把手剪，練練吓咁。」給客人剃鬚時，陳師傅雙手非常穩定，他反反手腕：「學師時要練手骹，練得柔軟，否則剃鬚時會刮痛客人，唔得㗎！」

■理髮椅下，一道磨得脫色的痕跡，是兩位師傅的活動軌迹。

■紅白標記，開店時已有。

拆解百年飛髮椅

■澳洲人Scott：「在澳洲，所有傳統的老式剪髮店都沒有了，平時我常在這經過，看到一班老人家在聊天很快樂，一直想來試試。」

■兩位老師傅，今日仍手腕柔軟手又定，刮完面，面頰亮晶晶的。

最憎披頭四

以為上海師傅是他們大敵，才不！他們的大敵，是唔剪頭髮的披頭四！「若果舊時整成披頭四咁，你日日都有難呀！你唔得啲警察滿意，佢哋唔理你係咩四，日日都叫你埋嚟、擰轉面拍埋牆，問你做乜嘢功夫（職業），你解釋妥當就放你一馬。你話你學得𠵱家啲人咁撐起腰，阿蛇（阿Sir）、阿蛇咁輕佻？佢就擰你埋牆，蛇吖嗱？你冇仇報呀！你梳晒啲頭髮去後面，乾淨整齊佢就唔理你。」多得警察幫忙，即使五十年代末，裝修豪華的上海理髮屋入侵，年卅晚，開滿廣東理髮店的小巷總是排長龍，西營盤第三街那邊曾經有十幾檔廣東理髮，統統滿座。
回到21世紀的年廿九，上午時分小店客人一個接一個，有專程由香港仔來的八旬翁，也有專登開車來，來個十分鐘飛髮短敍又趕開工的的士司機。但長椅上未見人龍。陳師傅：「𠵱家啲人都唔肯剪髮啦！」六十年代披頭四爆出，吹到七十年代溫拿、林子祥、阿倫等個個長髮及肩，胡師傅講起就氣：「披頭四最影響我哋呢行啦。個個長毛怪，影響晒啲香港人唔鍾意飛髮！你都係學披頭四之嘛！」又關我事？「你（個頭）呀，唔係唔飛四十次髮，邊留到咁長頭髮啫？」我無力地以「陳寶珠囉！」自衞，胡師傅以「嗰陣梗係興夏萍（柯德莉夏萍）裝啦！」這吓痛擊，氣勢上，我輸了。

■幾十年來只用到幾款剪刀。	■傳統刮鬚用的掃，現在買少見少。	■時至今日，小童剪髮$25，剪髮剃面也才$40，新年還沒加價。
■這把特別叫「田雞」的剃刀，比電動鬚刨更就手。	■店裏毛巾也是同行結業時給他們的。

法國花柱之謎

「友記」的門口，以這紅白斜間為記。原來這斜紋記號的來源有多個版本。陳師傅聽說是當年法國大革命，一理髮師協助革命軍領袖脫險，所以革命勝利後就讓髮型屋掛上國旗，作為功績標誌，漸漸演變成今日的花轉筒燈；又有說在15世紀時，因為醫生們都覺得污血不乾淨，於是請拿剪刀的髮型師兼任放血師，所以以白色代表繃帶，紅色代表血為記，讓人知道哪裏有放血師，流傳至今。

友記理髮

地址：西營盤第二街橫巷　鳴謝：長春社文化古蹟資源中心

■五十多年歷史的鐵風筒，記得小時候我阿爺都有一個，吹得出煙的，但風力強勁，90年代越高越潮的「擋風玻璃頭」，靠晒佢。

剪髮．術語

舊式飛髮舖，有好多有趣術語，師傅們講起仿若打暗號。今日當然逐漸失傳，你去salon髮型屋，再也聽不到了。

吹波：五、六十年代左右，男子流行將前髮吹起，形成頭頂一個「波」
草：指頭髮、好亂嗰種
草王：頭髮又多又亂的客人
趕蟻：剃鬚，當時人見你一面鬍渣，像成面螞蟻一樣
蝦仔、樹叔：貼士
父子十：二十元
大千里：十元

Source: appledaily

一代擦鞋師 機密留守

擦鞋兩個字，一塗一擦，只有夠快手有耐力的才能留低。這個另類武林在中環戲院里，有的像一線天的八極拳，快手密密打；有的像宮二以柔取勝，大家都靠雙手爭一餬口，好天曬、落雨無生意。這個平日熟口熟面的場景，背後的擦鞋師已買少見少，留下的靠心機與密密做，才不被淘汰留一席位。
記者：雷福財　攝影：陳盛臣
模特兒：Nadio＠Starz People
化妝及髮型：Jojo Cheung
服裝提供：The Swank

■訪問當日堅叔反應總是慢幾拍，隔籬檔另一擦鞋師偷偷爆料：「佢食白粉㗎！」如此指控無從求證，只知訪問中聽與問均辛苦是事實。

港式擦鞋
路邊偷師　愛見皮鞋立立令

人稱堅叔，57歲，擦鞋15年，無兒無女，與老婆同住公屋，即使有病亦每日過海開檔，亦未想過退休，只求做得就做。堅叔年輕時做過茶餐廳、大牌檔、搬運、收數佬，最愛還是幫人擦鞋，自言愛好自由自在，「我嘅兄弟姊妹1997年前全部移民去美國洛杉磯，淨係我無去到。去到嗰邊又聾又啞，留喺度開心好多。」邊學邊擦鞋？「邊有得學㗎，當年咪企喺隔籬偷師，之後咪膽粗粗自己做個鞋箱開檔，工具就係喺油麻地超級市場買嘅鞋蠟、鞋刷，嗰時未使攞牌（固定攤位小販牌），人人都做得，呢條街有七至八個擦鞋佬。」堅叔表示單靠擦鞋月入近萬元，加上老婆喺茶餐廳打工，兩口子已叫夠食。講到擦鞋經，堅叔緩緩道出：「擦鞋最重要有心機，求求其其梗係唔靚啦，最開心係見到對鞋立立令。呢度競爭及吵架實有發生，不過畀你擦幾多對鞋都唔重要，要同客人啱傾先有客人幫襯，以前都幫過曾江同王敏德擦鞋。不過近年呢條街走剩得四個師傅，其他的移晒民了。」

■擦鞋是講求多勞多得，早開早有生意，今日堅叔比原定遲了一小時開工。

■堅叔十多年都堅持用相同的鞋蠟。

■每日開工也要準備幾個鞋刷。

新移民靠雙手　自力更生

時勢使然，老一輩總有退下的一日。有錢搵的地方，不論幾辛苦，總有新人加入。戴姐40歲，新移民，育有一名10多歲兒子，兩年前開始擺檔，師承先夫，所有工具亦是，「我先生10幾年前已經喺度擦鞋，係佢教我點擦，仲話一定要落手做先會學識，後來佢過身後，我便擺檔。你知喇，我來自大陸，無文化，唔識繁體字，就算已有香港身份證都做唔到其他工作。每朝八點半開工，如果無落雨，一般做到夜晚七點幾先收工，然後買餸煮飯畀個仔食，開頭真係好唔慣，有諗過唔做。不過做擦鞋勝在自由，靠雙手搵到飯食，最緊要擦得夠快夠靚，幫到人自己都開心。」日擦20多對鞋，日收約$800，撇除周末，一個月都有萬二元收入，辛苦一點，但好過攞綜援多多聲。戴姐話來港多年，覺得香港多好人，亦儲落不少熟客，因此被隔籬檔的另一女擦鞋師欺侮，「所謂僧多粥少嘛，多個人自然多個競爭，佢試過將我啲鞋蠟掉走，好慘㗎！」

■戴姐擦起鞋來常面帶笑容，平均擦完一對只需六分鐘。	■戴姐不懂寫字，價目表是先夫留下的。	■各式鞋蠟以潤喉糖盒載着。
■擦鞋前	■擦鞋後

香港擦鞋史

曾是本土傳統行業的擦鞋匠，在1949年開始漸成一門街頭職業，以前多由小童做擦鞋師幫補生計，其後隨教育普及及工業興起，擦鞋行業便式微。當年的擦鞋足迹不限於中環，連尖沙嘴亦有，多以外國水手客為主。但因中環戲院里多老闆級及行政人員出入，加上當年皇后戲院和娛樂戲院人流暢旺，令戲院里成為擦鞋勝地。2009年政府發出八個固定攤位小販牌，令擦鞋匠繼續生存，現時約有四位繼續於戲院里擺檔。

■今日的戲院里

■六十年代的戲院里

英式擦鞋

■Bontoni啡色漆皮Derby Shoes$8,500（a）

步驟更繁複

一副官仔骨骨的紳士Look或行政裝束，沒有一對亮麗的皮鞋的襯托是不成事，對講究生活品味為主的男士來說，打理及修護一對皮鞋是一門學問，也是對完美的執着。除了地道街頭擦鞋術，要求高一點又愛好英式傳統擦鞋文化，就要記住專營歐美靚皮鞋店Tassels。據Tassels店員組長Wallace表示，其外籍與本地客群比例相若，大多以行政人員為主，當中亦包括遊客，而明星捧場客則有王敏德。

擦鞋10部曲

Step1：將客人的鞋帶收好，避免擦鞋時沾到鞋蠟或鞋膏，而且不會阻礙擦鞋面。	Step2：以馬毛刷將鞋面及鞋邊的灰塵輕輕擦走，特別是隙縫邊位。	Step3：以乾布再將鞋面的沙塵抹走。
Step4：於布上噴少量水，以抹走鞋面的污迹。	Step5：將鞋膏塗滿整對鞋，作用是滋潤皮革。	Step6：塗完鞋膏後，便會用這個大號的馬毛刷，輕輕地將整對鞋再仔細擦一次。
Step7：把鞋蠟以打圈方式塗於鞋面上，令皮鞋開始富有光澤。	Step8：再用馬毛刷將皮鞋刷多次，令鞋蠟分佈得更均勻。	Step9：用拋光布將整對鞋包括鞋頭及鞋踭兩邊拋光，令光澤更為凸顯。
Step10：最後為鞋邊進行補色，一對皮鞋猶如新的一樣。	■Bontoni淺灰啡色Monk Strap$8,500（a）	■Cheaney×Herring Holmes啡米色Oxford Shoes$4,090（b）
■Corthay橄欖色Oxford Shoes$13,800（c）	■Alden黑色Wing Tip Shoes$5,900（a）	■Giorgio Armani藍白色Wing Tip Shoes$6,400（d）
■Church's啡色Oxford Shoes$5,900（e）

■Saphir皮鞋護理箱以全木打造的鞋箱配合皮製手柄，別具懷舊味道。$4,100/包括各式馬毛刷、鞋蠟、鞋膏、擦鞋布（a）

皮鞋與補品

靚皮革可帶出個人品味，但日子久了加上香港大多處於偏潮濕天氣，如何保養鞋類皮革，其實是一門耐性及學問。皮鞋主要以牛皮及麖皮製成，較少的還有羊皮、鱷魚皮、蛇皮等，不管是哪種皮革，水份及濕氣均是天敵，除用刷除塵、鞋膏滋潤防龜裂、鞋蠟令鞋具有光澤外，更要噴些防水噴霧令皮鞋能抵禦微量水份，亦可減低令鞋面深淺的礙眼水迹。

■Saphir各式鞋膏（自然色、酒紅色及灰色）$180/個（a）	■Saphir羊皮皮膏$280（a）	■Paul Smith皮鞋防濕噴霧$120（f）
■Paul Smith皮鞋護理袋$1,400/包括各式馬毛刷及鞋蠟（f）	■Saphir馬毛刷$400（a）	■Alden麖皮刷$100（a）

Shoplist　

a. Tassels Gentlemen's Shoe Store（27899911）　
b. houses（27215688）　
c. Corthay（25238877）　
d. Giorgio Armani（25327777）　
e. Church's（21968452）　
f. Paul Smith（25235868）

Source: appledaily