飲飲食食, 生活點滴, 健康生活: 宅錄：民間療法　碌雞蛋專醫面　受傷72小時咪試!

民間療法，每個人屋企總會儲落幾招秘方！好似細路仔撞瘀碰傷，大眾「必殺技」一定係碌雞蛋，但當你問點解會用雞蛋唔用其他嘅時候，又未必答得出喎；究竟呢啲民間偏方有無科學根據？定還是上一代以訛傳訛？今日我哋搵嚟城中數一數二跌打師傅、中西醫生同運動教授同大家解說！

記者：胡靜雯
攝影：林栢鈞
模特兒： Chloe＠ Pure Models

何醫師

40年跌打醫師　教碌雞蛋

碌雞蛋看似簡單！但各處鄉村各處例，連殼、去殼、放銀戒指……究竟邊樣先啱？今日就搵嚟喺西環40年歷史、何國偉跌打醫館講解：「碌雞蛋主要係碌面部！因跌打藥酒有令皮膚發黃嘅成份！身體其他部位碌雞蛋亦無不可，主要靠熱力散除瘀血。」

超錯！

原蛋連殼碌

呢個係最 Raw嘅方法，連殼直碌的確係熱度較高！可能你一心諗住會易啲去瘀消腫；不過對唔住，醫師話熱力過高可能會燙傷皮膚，更重要係如果用力過大，蛋殼破碎，更有機會割傷皮膚；需知流血的時候，是不可以用任何藥物或療法消腫去瘀，要再待痊癒才可，會加長了治療時間。

正確！

毛巾包雞蛋

是坊間最常見方法，將煲熱的雞蛋連殼以毛巾包裹，在患處上碌；原理主要是透過雞蛋既熱力促進患處血液循環；醫師教路，最好在患處打圈咁碌，這樣可有效推散瘀血、加速去瘀功效：「如果是手腳等肢體位置，建議雞蛋可由患處碌向心臟或淋巴位置，原理係順着血管的流向，加大散瘀功效。」

中醫　加銀器去埋邪風

民間療法其實很多都是來自中醫學說，所以關於雞蛋去瘀，中醫確實是有此說法。香港註冊中醫學會執委學術部主任朱恩博士就話雞蛋主要針對在面部瘀傷，身體其他部份可用膏藥。
將銀器連雞蛋一齊碌嘅做法，朱博士認為是有根據的：「如果筋骨脈絡受到損傷，氣血凝滯，加上血離經脈，瘀血便會積聚；這時利用雞蛋嘅熱力去瘀，有利血液循環，活血化瘀。再加上銀器，便能吸走體內嘅邪風。」
其實中醫所講嘅風，即所謂六淫：風、寒、暑、濕、燥、火六種外感病邪的統稱。當六氣與身體不能互相適應時，就會導致疾病。「銀器是金屬能產生氧化作用，在患處不斷按摩能吸走體內邪氣，可以疏通經絡，散寒止痛。碌完嘅雞蛋會吸入瘀氣，所以不能再吃。」

朱恩博士	■方法是先將雞蛋去殼，再將銀戒指放入蛋中。

西醫　碌雞蛋合乎去瘀原則

兒科聖手李家仁醫生就話點解用雞蛋？唯一想到嘅原因，就係雞蛋表面平滑，不會弄傷皮膚；加上雞蛋本身帶熱，在熱敷嘅處理上能促進血液循環和新陳代謝，絕對合乎去瘀原則。
至於瘀傷是怎樣形成，李家仁醫生說：「這是由於皮下組織透過很多微絲血管運送營養和血液；當受到撞擊後，微絲血管爆裂便會造成瘀血和紅腫。其實血液循環便能排走瘀血；如果同碌雞蛋比，藥膏可直接滲入皮膚，成效會更好。中醫話，將銀器連蛋一齊碌可散瘀驅風，究竟西醫又有無根據呢？「任何銀器經氧化作用都會變色，皮膚結構十分精密，絕對不會咁容易吸走任何體內物質。銀器就咁擺喺度都自然會氧化，加上熱力也一樣會變黑；所以我認為將銀器連蛋一齊碌是完全不科學的。」

李家仁醫生

（上）強效
■療瘀痛：屬強效類別，除去瘀腫，也被醫學界廣泛用於靜脈炎症上；要腫到豬蹄一樣先好用佢！

（下）無色
■利百素 N：質地透明，加上質地唔油膩；愛貪靚嘅 OL至 Like！

■喜療妥：藥性十分溫和，由於含有酒精成份，令患處有清凉感；小朋友撞親即刻搽，凉一凉起碼都無咁痛嘛。

■受傷後，可用毛巾包裹冰包，利用冰敷減少內出血機會。

體育專家
先冰敷　後熱敷

做運動經常都會有身體碰撞或外來撞擊而導致瘀傷，香港浸會大學體育學系副教授雷雄德博士就話，一般情況都係使用冷熱敷療法：「對於簡單或急性嘅瘀傷處理，應首先減少內出血機會，先用冰敷，讓瘀血不會擴散到其他地方；第二步用壓力包，除有保護作用，更可令患處停止腫脹。」
不過在受傷後72小時內做熱敷，是完全錯誤的：「按摩會令病情惡化！因皮下血管凝血未完全形成，血液循環會讓本來的瘀血擴大和更腫！」所以需要過咗「黃金72小時」先可以用熱敷或輕量按摩，促進血液循環，帶走多餘嘅液體分泌和壞死嘅血球！

■冷敷後可用壓力繃帶，作保護和避免患處水腫。